Senajan jenenge dhawet goreng, nanging ing penyajiane dudu dhawete sing digoreng. Jalaran sing digoreng yaiku bumbu lan racikan bahan-bahan liya kang disajekake ing samangkok dhawet goreng.
Beda kaya umume dhawet sing digawe saka glepung beras utawa pathi tela. Dhawet sing digunakake kanggo nggawe dhawet goreng iki digawe saka glepung ganyong.
Pamilihan glepung ganyong minangka bahan utama jalaran ganyong duwe rasa legi kang khas.
Carane nggawe dhawet saka glepung ganyong iki padha karo dhawet umume. Glepung ganyong disampur banyu lan disaring. Sawise kuwi banjur digodhog.
Bareng dirasa cukup lan wiwit adhem. Dhawet banjur dicithak. Yen wis dicithak dhawet siyap diracik karo bahan-bahan liyane.